Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, «Бо́гу побе́дную песнь пои́м» вопия́ше.

Непрохо́дную дверь, чистоты́ храм, до́брую в жена́х, Святу́ю Влады́чицу, ве́рнии, сладко пе́ньми свяще́нными просла́вим.

Живы́й Бог Сло́во на небесе́х, Иже в нача́ле Безнача́льный, не́бо слове́сно Тя на земли́ соде́лав, Чи́стая, не оста́вль небесе́, в Тебе́ всели́ся.

Со́лнца о́блаче, све́щниче светоза́рный и многосве́тлая свеще́, души́ ́́́моея́ трича́стное, е́же грехми́ помраче́но, просвети́, молю́ся, Всенепоро́чная.

Богора́дованная Отрокови́це, держа́вная ве́рных по́моще и наде́ждо смире́нных, Ты мя свободи́ сласте́й плотски́х и страсте́й, борю́щих мя.