Ирмос Иса́йе, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́; Его́же велича́юще, Де́ву ублажа́ем.

Дще́ри Свята́го Иерусали́ма, потщи́теся ви́дети Неве́сты благосла́вныя зрак, Мари́ю Нескве́рную, и благоче́стно воспо́йте Той: ра́дуйся, Всепе́тая Богоро́дице, ра́досте на́ша.

Избра́нна, благоприя́тна вся яви́лася еси́ Бо́гу, я́ко крин цветонося́й те́рнии́ посреде́, от ни́хже Тя в благоуха́ние де́вственно обре́те Себе́ и предста́тельство показа́ чту́щим Тя.

Нард, арома́ты иска́пающ, Нетле́нная, Чи́стая же и До́брая в жена́х вои́стинну яви́лася еси́; красе́н взор Твой и глас испо́лнь есть благи́х; Избавле́ние согреше́ний бо родила́ еси́ пою́щим Тя.

Душа́ моя́ прильпе́ псало́мски, Влады́чице, вся по Тебе́[70]; сего́ ра́ди десни́ца Твоя́ да засту́пит мя, молю́ Ти ся, спаса́ющи ны́не и содержа́щи, храня́щи и покрыва́ющи.

Стихиры, глас пятый. Подобны:Ра́дуйся, по́стников:

Ра́дуйся, Де́во Ма́ти Честна́я, кипари́се превысоча́йшии́ и благово́нный, на высоту́ зре́ния боже́ственно правоше́ствуяй; ке́дре, в Лива́не процве́тшии́, кре́пок и помышле́ньми незы́блем отню́д; ма́слино Боже́ственная, благоцве́тна и плодови́та и Ду́ха испо́лнена благода́тьми; виногра́де, Грозд зрел израсти́вый ми́ру, сердца́ весели́й любо́вию и́ко Богоро́дицу госпо́дственно велича́ющих Тя.

Ра́дуйся, Дево Ма́ти Честна́я, кро́ткая Голуби́це и благода́тьми Ду́ха Свята́го все́ми посре́брена, и в междора́миех позлаще́на; Го́рлице любобезмо́лвная и любочисто́тная; Ла́стовице благода́ти пресла́дкая, ве́сну благоуха́нную от зимы́ приносящая; Пти́це, яко слави́й громковеща́нный воспе́вшая и ми́ру Сло́ва Бо́жия воплоще́ние уве́рившая; Бо́га, ра́дуйся, Ма́ти, подаю́щаго ми́ру ве́лию ми́лость.

Ра́дуйся, Дево Ма́ти Честна́я, исто́чниче, Во́ду жи́зни излива́яй; росо́ небе́сная, от Аермо́на мы́сленна на го́ры Сио́ни низходящая; дождь во́лен, его́же Бог на зе́млю достояния Его́ отлучи́ в ве́чное ороше́ние и отра́ду; мо́ре сла́дкое и удобопрохо́дное, вса́дники же три ста́ты фарао́ни пото́пльшее; Бо́га, ра́дуйся, Ма́ти, подаю́щаго ми́ру ве́лию ми́лость.

Ру́це к Тебе́ простира́ю и уста́ скве́рная отверза́ю к моле́нию, и преклоняю се́рдца коле́но, и мы́сленно нога́ма всенепоро́чныма Твоима прикаса́юся ны́не, Чи́стая, и припа́даю Ти: боле́зни мои исцели́, ле́тныя[71]мно́ги и неисце́льны бла́гостию Твое́ю уврачу́й язвы, изба́ви же от назира́ющих мя враг неви́димых; облегчи́, Отрокови́це, тяготу́ уны́ния моего́, я́ко да воспева́ю и сла́влю Тя, Еюже мир обре́те ве́лию ми́лость.