Ирмос: Ру́це распросте́р Дании́л, львов зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: «Благослови́те, вся дела́ Госпо́дня, Го́спода».

Жезл из ко́рене Иессе́ова, Де́во, яви́лася еси́, Цвет изра́стши, Всеси́льнаго Го́спода, облагоуха́вшаго ны и обоня́ние подаю́ща Свое́ взыва́ющим: вся дела́, по́йте Го́спода.

Отверза́ется па́ки и́же пре́жде Тобо́ю рай, и вво́дится пре́жде осужде́нный челове́к, и обожа́ется и́стиннеи́ше, Богора́дованная, челове́ков смеше́ние[47], вопию́щих: вся дела́, по́йте Го́спода.

Изба́ви мя ярма́ тя́жкаго прегреше́ний, Благода́тная, и се́рдце мое́ сокруши́, ду́шу уясни́ и ума́ гнило́е уста́ви и нестоя́тельное, да воспева́ю: вся дела́, по́йте Го́спода.

Неду́гующую, Де́во, ду́шу мою́ исцели́ и ю́же во мне ти́ну страсте́й омый, и суди́лищу Вседержи́теля Бо́га предста́ви всего́ спаса́ема, да песнопою́: вся дела́, по́йте Го́спода.