Ирмос: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: «Благослови́те, вся дела́ Госпо́дня, Го́спода и превозноси́те во вся ве́ки».

Рыда́я Дави́д прелюбодея́ния и уби́йства, воспе́: «Поми́луй мя, Бо́же, Бо́же мой». Аз же, тьма́ми пови́нен грехо́в, ка́ко обра́щу проще́ние, а́ще не Твоими к Нему́ мольба́ми очи́щуся?

День от дне, Богоро́дице, услажда́юся при́сно наде́ждами су́етными, е́же пока́ятися иски́й, па́ки же обы́чаем де́йствуяи́, теку́, я́ко пес на блево́тину, к злосмра́дию нечи́стых страсте́й.

Покая́ние жития́ втора́го полага́ет заве́ты в Госпо́де и па́дшия воздвиза́ет, плач низлага́ет и све́тлы сия́ представля́ет Сотво́ршему, с ни́ми же да вчиню́ся и аз, Богома́ти, моле́бник Твой.

Испо́лнися зол душа́ моя́, прибли́жися а́ду живо́т мой, вмени́хся я́ко челове́к от враг моих еди́н безпомо́щен; но покажи́, ми́ра держа́вное заступле́ние, я́ко безпомо́щных еси́ Помо́щница.