Ирмос: Образ чи́стаго рождества́ Твоего, огнепали́мая купина́ показа́ неопа́льная; и ныне на нас напа́стей свирепеющую угаси́ти молимся пещь, да Тя, Богородице, непреста́нно велича́ем.

Да ра́достно пе́нии благода́рственными почеству́ю Тя, и во всем животе́ мое́м велича́ю, Отрокови́це, изба́ви мя от уст льва, лю́те рыка́юща и поглоти́ти мя и́щуща.

Яви́лася еси́ свяще́нный черто́г и чи́стая, Де́во, пала́та Христа́, пре́жде век и́стинно ца́рствующа и держа́вствующа все́ю тва́рию. Те́мже се́рдце мое́ от нечи́стых страсте́й очи́сти.

Уста́ви пло́ти мудрова́ние и страсте́й, Де́во, молву́ утоли́ прибега́юща к кро́ву Твоему́, Богороди́тельнице, и наде́жды основа́ние Тя иму́ща, и Боже́ственным предста́тельством обогати́вшася и заступле́нием.

Возведо́х ду́шу мою́, Влады́чице, к Тебе́ и всем ра́зумом Ти вве́рихся, да не постыжу́ся во ве́ки, раб Твой, ниже́ врази́ мои да посмею́т ми ся мы́сленнии, в час отше́ствия пое́млюще мя.

Стихиры, глас первый. Подобны:Небе́сных чино́в:

Ра́дуйся, Бо́га Всесвята́го хра́ме всесвяты́и́; ра́дуйся, царе́й непобеди́мая де́рзосте, всех предста́тельство земноро́дных; ра́дуйся, глубине́ безме́рная, недомышля́емая высото́; ра́дуйся, ра́досте скорбя́щих и утеше́ние.

Ра́дуйся, Отца́ Пребезнача́льнаго Неве́сто Всенепоро́чная; ра́дуйся, Собезнача́льнаго Сы́на Ма́ти и Де́во; ра́дуйся, чистоты́ сосу́де, Яже Ада́му Еде́м отве́рзшая; ра́дуйся, о́блаче всесве́тлый, ве́рных согрева́яй и покрыва́яй.

Ра́дуйся, Непристу́пнаго Све́та черто́же Боже́ственный; ра́дуйся, село́ благопло́дно, прозя́бшее Клас; ра́дуйся, злополу́чных наде́жное исправле́ние; ра́дуйся, мо́сте, всех к животу́ преводя́й моле́ньми Твоими.

Стра́сти разли́чныя обурева́ют смире́нную мою́ ду́шу и в глубину́ влеку́т отча́яния; предвари́в мя, спаси́ я́ко Блага́я, к Тебе́ бо прибего́х, кре́пкому и держа́вному предста́тельству, да не отпаду́ проше́ния.