Ирмос: Еди́не ве́дый челове́ческаго существа́ не́мощь и ми́лостивно в не́ вообра́жься, препоя́ши мя с высоты́ си́лою, е́же вопи́ти Тебе́: Свят одушевле́нный Храм не изрече́нныя сла́вы Твоея́, Человеколюбче.

Еди́на естество́ челове́ков обо́жши, Всенепоро́чная, от преесте́ственнаго Рождества́ Твоего́ испроси́ грехо́в проще́ния на́ших и весе́лия ве́чнующа, Пресвята́я Де́во Всепе́тая.

Страно́, Клас живота́ безсе́менно израсти́вшая и невозде́ланно процве́тшая, гла́дом иста́явшу бра́шна Боже́ственнаго ду́шу мою́ утверди́ хле́бом Бо́жиих дел, доброде́телеи́ еле́ем утучня́ющи.

Из Тебе́ процвете́ нам Цвет безгре́шен, облагоуха́яй все челове́чество ми́ром[18]Боже́ственным Его́ естества́, Отцу́ Собезнача́льный и от Тебе́ под вре́менем бы́вый, Мари́е Всенепоро́чная.

Виде́ние зра́ка Твоего́ честна́го а́нгелом гове́йно, челове́ком же есть спаси́тельно, и стра́шно лука́вствия духово́м; его́же ве́рою чту́ще и лобыза́юще, Богоро́дице, душа́ми просвеща́емся.