Ирмос: Впещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: «Благослови́те, вся дела́ Госпо́дня, Го́спода, по́йте и превозноси́те во вся ве́ки».

Яко от ко́рене Иессе́ова прозя́бшая, изно́сиши Цвет, Богороди́тельнице, неувяда́емь Христа́, сего ра́ди молю́ся: страсте́й моих вся из коре́не возми́ те́рния, и Боже́ственный страх всади́ ми, Отрокови́це.

Яко красну́, я́ко преудобре́нну, я́ко Непоро́чну Тя Де́ву, я́ко Неве́сту избра́нну, я́ко Чи́сту Отрокови́цу де́вственну, я́ко нескве́рну и свя́ту Тя воспева́ем и любо́вию покланя́емся Благослове́ннеи́ во вся ве́ки.

Тебе́ и сте́ну, и прибе́жище, и ле́ствицу, к высоте́ преводя́щую челове́ки, Де́во Мариа́м, зря́ще, вопие́м: благослови́те, вся дела́ Госпо́дня, Го́спода, по́йте и превозноси́те во вся ве́ки.

Свята́я земле́ и избра́нная, на нюже покрыва́лом неве́рствия покрове́ни сумня́щихся помысло́в николи́же ступа́ху но́зе, ум мой земных покажи́ попече́ний превы́шш, и земли́ кро́тких сподо́би мя.