Ирмос: Образ чи́стаго рождества́ Твоего́, огнепали́мая купина́ показа́ неопа́льная; и ныне на нас напа́стей свире́пеющую угаси́ти мо́лимся пещь, да Тя, Богоро́дице, непреста́нно велича́ем.

Ра́дуйся, Ма́ти всех Царя́; ра́дуйся, мирски́я ра́дости вина́, Всечи́стая; ра́дуйся, Тели́ца обра́зна, Тельца́ нося́щая Иису́са, Спа́са и Го́спода; ра́дуйся, Све́та прия́телище; ра́дуйся, согреша́ющих очище́ние.

Ра́дуйся, всех удобре́ние; ра́дуйся, клеще́, Боже́ственный Угль нося́щая; ра́дуйся, багряни́це Ца́рская светлопозлаще́нна; ра́дуйся, зако́нов Бо́жиих храни́ло; ра́дуйся, я́ко прорече́ния проро́ческая Я́ве сконча́вшая.

Ра́дуйся, не́бо зве́здное, преиспещре́но доброде́телей све́тлостьми; ра́дуйся, Цари́це, одесну́ю Влады́ки Твоего́ стоя́щая, одея́ние иму́щи че́стно и украше́нно, я́ко Дави́д Тебе́ возопи́.

Ра́дуйся, слове́сный раю́, Дре́во живота́ посреде́ Христа́ прозябы́й, пе́рваго дре́ва го́речь разо́ршаго, дре́вле тле́ю уме́ршия услади́вша и Боже́ственныя жи́зни прича́стники я́ показа́вшаго.

Стихиры, глас первый. Подобны:Небе́сных чино́в:

Ра́дуйся, Све́та о́блаче и сто́лпе о́гненный, у́мнаго вводя́й Изра́иля в досто́йный поко́й; Де́во, ра́дуйся, Ада́мово чи́стое исправле́ние и слез Евиных избы́тие; ра́дуйся, ми́рови по́моще.

Ра́дуйся, клеще́, Боже́ственный Угль нося́щая; ра́дуйся, Це́ркве неразори́мая стено́; ве́рных, ра́дуйся, держа́во; ра́дуйся, челове́ков к Бо́гу очище́ние; ра́дуйся, мо́сте, преводя́й к Животу́ пою́щия Тя, Богоневе́сто.

Ра́дуйся, Всецаря́ Ма́ти; ра́дуйся, Цари́це мирски́х цари́ц, Богоро́дице Мари́е; ра́дуйся, немощству́ющих ско́рая цельба́ и избавле́ние; ра́дуйся, сла́досте, и́же во Еде́ме рая́ без сравне́ния преиму́щая.

Заря́ми нетле́нными Ду́ха Боже́ственна озари́тся даждь помраче́ннеи́ души́ мое́й, и тьмы кроме́шныя изми́, и водворя́тся всегда́ во све́тлостех святы́х ра́достно, Богоро́дице, сподо́би.