Ирмос: Пла́вающаго в молве́ жите́йских попече́ний, с корабле́м потопля́ема грехи́ и душетле́нному зве́рю примета́ема, я́ко Ио́на, Христе́, вопию́ Ти: из смертоносный глубины́ возведи́ мя.

Вети́йствующая уста́ словесы́ сказа́ти не мо́гут чу́до рождества́ Твоего́, е́же го́рним си́лам непостижи́мо: еди́на бо неизрече́нно заче́нши, родила́ еси́ от Ду́ха Свя́та, Всечи́стая.

Яко добру́ Тя еди́ну в жена́х и красну́, я́ко всю нескве́рну и свя́ту, я́ко свяще́нну, я́ко че́ст- ну и непоро́чну, я́ко чисте́йшу Тя вся́кия тва́ри обре́т Соде́тель, в Тебе́ всели́ся.

Исцеле́ний струи́ источа́вши, Богоро́дице Де́во, уставля́вши неду́ги и подае́ши весе́лие ве́рою воспева́ющим Тя; те́мже неду́гующу грехми́ исцели́ ду́шу мою, Блага́я, и спаси́ мя.

На мно́жество взира́яй благоутро́бия Твоего́, Де́во, со слеза́ми припа́даю и зову́: исправ- ля́ющи весь живо́т мой, в разреше́нии телесе́ бу́ди ми поко́й и изба́ва.

Седален, глас седьмый. Подобен:Го́споди, мы есмы́:

Влады́чице, прогне́вася Сын Твой проше́ньми грехо́вными, ми́лование бо на гнев обрати́хом, но на ми́лость, Нескве́рная, Его́ премени́. Умилосе́рдися, Ма́ти Де́во, и моле́нии самодви́жными уми́лостиви Благоутро́бнаго изба́вити плене́нныя.