Ирмос: Безнача́льна Роди́теля Сын, Бог и Госпо́дь, воплощен от Де́вы, нам яви́ся, омраче́нная просвети́ти, собра́ти расточе́нная; тем Всепе́тую Богоро́дицу велича́ем.

Христо́ва, ра́дуйся, кни́га одушевле́нная; я́же от любве́ Тебе́ вопию́щих «Ра́дуйся, Богора́дованная, ра́дуйся, присе́нная горо́!», я́ко на Тя наде́жду возло́жших, вся́каго неудо́бства изба́ви.

Душ просвеще́ние и теле́с цельбу́ «ра́дуйся» вопию́щим Ти ско́ро пода́ждь, све́щниче богоза́рный, Всенепоро́чная, и стоя́ние проше́ньми Твоими в час су́дный десно́е нам испроси́.

Отринове́н, окая́нный, ко а́ду сведо́хся, но ру́ку пре́жде конца́ ми даждь, вопиющу Ти «ра́дуйся», о́блаче све́тлый, и от вся́каго безу́мия исхити́ ненави́дящих мя, Богоневе́сто.

Никто́же на Тя упова́ и постыде́ся нигде́же; сего́ ра́ди ве́рою прибега́ющия к хра́му Твоему́ и любо́вию «ра́дуйся» а́нгельски вопию́щия не оста́ви, от вся́каго зла соблюда́ющи.

Стихиры, глас вторый. Подобен:Егда́ от дре́ва:

Ра́дуйся, приснотеку́щая реко; ра́дуйся, неисчерпа́емый источниче, исполнь вод многих, и́миже напаяется тварь вся и сердца́ веселя́тся, жа́ждою иста́явшая и пла́менем держи́мая прегрешений; ра́дуйся, светлая Влады́чня и кра́сная пала́те; ра́дуйся, грешных исправление.

Радуйся, всесвятый начаток рода человеча, из него́же обнови́ все естество́ на́ше Христо́с Госпо́дь; ра́дуйся, земле́ невозде́ланная и утро́бо Боже́ственная, плодоприне́сшая жи́зни Клас; ра́дуйся, проро́ков зерца́ло, апо́столов сла́во; ра́дуйся, му́чеников держа́во.

Ра́дуйся, нетварнаго и тварнаго естества преде́л, еди́на Чи́стая су́щи; ра́дуйся, одушевле́нное до́брых и благи́х огла́вие; ра́дуйся, многосложе́ние благода́тей; ра́дуйся, до́ме о́бщий Боже́ственных и челове́ческих вку́пе и а́нгельских дарова́ний, и ве́ликое оби́телище.

Испо́лни весе́лия ны́не се́рдце мое́, Богоро́дице Де́во, молю Ти ся: приидо́ша бо во́ды до него́ вои́стинну, в ти́ну углебо́х глубины́ поги́бельныя, уже́ и до дна́ а́дова прибли́жихся; Ты у́бо я́ко Петру́ ми ру́ку простри́, Безневе́стная Ма́ти, человеколю́бия Твоего́ и спаси́ мя.