Ирмос: Бе́здна после́дняя грехо́в обы́де мя, и исчеза́ет дух мой; но прострый, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Дре́во и сад Тя присноцвету́щ позна́хом, Отрокови́це, Жи́знь процве́тшую, Христа́ Бо́га на́шего, Реку́ ми́лости; те́мже я́ко Богоро́дицу Тя госпо́дственне почита́ем.

Неопа́льну я́же в Сина́и купину́ Твоего́ рождества́, Чи́стая, воображе́ние соблюде́, и нас покро́вом Твоим от вся́кия изба́ви печа́ли, зане́ я́ко Богоро́дицу Тя госпо́дственне почита́ем.

Со слеза́ми припа́даю Ти, Блага́я, и вопию́: поми́луй, Влады́чице, и́же мно́гим пови́ннаго грехо́м и страсте́м, да Тя я́ко Богоро́дицу госпо́дственне почита́ем.

Всели́ся благода́тей в Тебе́ Исто́чник, сего́ ра́ди благода́ть расточа́вши чту́щим Тя; те́мже и мое́, Де́во, се́рдце бога́тно облагодати́, и́бо Богоро́дицу Тя госпо́дственне почита́ю.

Седален, глас третий. Подобне:Божественныя ве́ры:

Престо́л всезлаты́й Царе́в и рай цветоукра́шен яви́лася еси́, Всепе́тая Богоро́дице: Бо́га бо во утро́бе Твое́й поноси́вши, облагово́нствуеши ны благода́тьми Боже́ственными; те́мже вси Бо́жию и́стинно Ма́терь Тя пропове́дуем при́сно и вели́чаем.