Ирмос: Вску́ю мя отринул еси́ от лица́ Твоего, Свете Незаходи́мый, и покры́ла мя есть чужда́я тьма, окая́ннаго? Но обрати́ мя и к све́ту за́поведей Твоих пути́ моя напра́ви, молюся.

Ле́ности сном и дремотою нераде́ния отягче́н безчу́вственно есмь, и во мра́це страсте́й обношу́ся, но просвети́ мои очи, све́та врата́, да ника́коже усну́ в смерть.

КТебе́ припа́даю и вопию́: умертви́, Всенепорочная, ца́рствуяй и живы́й от неду́гования ума́ во мне грех, и Живота́ мя Боже́ственнаго прича́стника сотвори́, плотски́м мудрова́нием умерщвле́на.

Яко ю́ноши три неопа́льны в пламенопита́тельнем ме́сте лику́ющия и попира́ющия сласте́й клокочущу пещь, души́ моея́ трича́стное покажи́, Еди́наго Святы́я Троицы Рождшая.

Тучеродный облак, воду кропя́щ разу́мную, иста́явшия же неве́жства пла́менем и оскуде́вшия прохлажда́яй и росоточно назида́яй, ве́мы Тя, Отрокови́це Всепе́тая.