Ирмос: Ты моя́ кре́пость, Го́споди, Ты моя́ и си́ла, Ты мой Бог, Ты мое́ ра́дование, не оста́вль не́дра Отча и на́шу нищету́ посети́в. Тем с проро́ком Авваку́мом зову́ Ти: си́ле Твое́й сла́ва, Человеколюбче.

Ты и́стиннаго спасе́ния подложе́ние, Богома́ти, еди́на была́ еси́, плоть взаимода́вши Творцу́ и Зижди́телю от нескве́рных Твоих крове́й, е́юже сме́ртная сокруши́шася врата́ и живо́т челове́ком дарова́ся.

Новоцве́тен безсме́ртия раи́ и красе́н во и́стинну, и живота́ дре́во показа́лася еси́, Дре́во жи́зни в Тебе́ богонача́льнейше насажде́но чревонося́щи и ражда́ющи, всем иска́плющее живоно́сная упова́ния, Богоро́дицу ве́рно му́дрствующим Тя.

Дави́дски от царе́ва прозя́бши сродства́, Всецарю́ющаго и пре́жде век от Отца́ Сло́во неизрече́нно и па́че ума́ возсия́вшее родила́ еси́, Де́во; те́мже Богоро́дицу Тя богому́дренно ве́рнии возвеща́ем.

Соде́тель от ве́ка обре́те Тя во удо́лии крин чисте́йш, доброде́тельми сия́ющу, Непоро́чная, глубино́ю чистоты, благогове́инства широто́ю, и в ро́де возвы́сил есть челове́честем; те́мже Тя я́ко Ма́терь Творца́ сла́вим.