Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Умерщвле́нныя страстьми́ грехо́вными, Влады́чице, возста́вльши ны, оживотвори́ моле́ньми Твоими, тли Потреби́теля ро́ждшая.

Испроси́ оставле́ние прегреше́ний, Влады́чице Чи́стая, и страсте́й свобожде́ние рабо́м Твоим, от души́ вы́ну Тя благохва́лящим.

Земноро́дных предста́тельствуи́ в боле́знех всегда́, Непоро́чная, и лю́тыя облегча́ющи, служи́тели Твоя́ це́лы сохрани́.

Очище́ние прегреше́ний, неду́гов цельбу́, скорбя́щим ра́дость даде́ Тя Христо́с, и пою́щим Тебе́, Нескве́рная, похвалу́.

Седален, глас пятый. Подобен:Собезнача́льное Сло́во:

Безприкла́дную благода́ть благоутро́бия и Боже́ственную держа́ву могу́тства Твоего́, Де́во Ма́ти, ве́дый, вопию́ Ти приле́жно: вся́кия ско́рби раба́ Твоего́ исхити́ и утеше́ния испо́лни, я́ко да воспева́ю Тя, Всепе́тая.