Ирмос: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый

разстоя́щаяся естества́; тем веселя́щеся, Тя, Богоро́дице, велича́ем.

Нескве́рная, светоиме́нная Отрокови́це, светоно́сною Твое́ю мольбо́ю ума́ моего́ зе́ницы просвети́ и чу́вства теле́сная, да узрю свет Светода́вца и Спа́са моего́.

Еди́н превзыдо́х, Деви́це, блудо́м земноро́дных вся́кое естество́, и яви́хся ското́в безслове́сных несмы́сленнейш, но све́том моле́ний Твоих светонаста́ви, молю́ся.

Согреши́х окая́нный аз попремно́гу, но Ты, Де́во, мя просвети́, и изба́ви тьмы ве́чныя, и к жи́зни наста́ви нетле́ннеи́ и небе́сному наслажде́нию.

Отрокови́це, ра́дуйся, Всенепоро́чная; ра́дуйся, Безневе́стная Де́во; ра́дуйся, а́нгелов сла́во, и апо́столов, ра́дуйся, похвало́; ра́дуйся, му́чеников ве́нче и преподо́бных весе́лие.

Стихиры, глас четвертый. Подобны: Яко до́бля в му́ченицех:

Ра́дуйся, Нескве́рная Влады́чице, Бо́жия пала́то, и а́нгелов, ра́дуйся, весе́лие; ра́дуйся, Ада́мово воззва́ние и Евино избавле́ние; ра́дуйся, ле́ствице у́мная, ме́ртвыя возводя́щая к небеси и славе нетленней; ра́дуйся, царей православных держа́во и нерушимое ограждение.

Ра́дуйся, Отроковице Всенепорочная, священных све́тлосте и царствующих, ра́дуйся, диади́мо; ра́дуйся, а́дово умерщвле́ние; ра́дуйся, гре́шных очище́ние; ра́дуйся, глубине́ помысле́м безме́рная и высоте́ неизрече́нная; ра́дуйся, пла́чущих ра́досте; ра́дуйся, покрове ве́рно к Тебе́ притека́ющих и моля́щих Ти ся, Нескве́рная.

Ра́дуйся, тва́ри всея́ пречу́днеи́шее Созда́ние; ра́дуйся, богословия подложе́ние; ра́дуйся, краести́шие Писа́ний и прорече́ний Боже́ственных, Всечи́стая; ра́дуйся, проре́чество и сбытие́ всеконе́чное; ра́дуйся, Еюже покланя́емся Еди́ному в Троице Божеству́.

Иду́шу и те́ло мое́, и мысль Тебе́, Всечи́стая Богома́ти, привозложи́х: овой у́бо приноше́ния испроси́, ового же взыгра́ния умертви́, ову же све́том Твоим Боже́ственным просвети, да благоду́шен созерца́ю Троицы сла́ву и непреста́нно велича́ю Тя, всесве́тлую Влады́чицу.