Ирмос: Еди́наго Безнача́льнаго Царя́ Сла́вы, Его́же благословя́т небе́сныя си́лы, и трепе́щут чи́ни а́нгельстии, по́йте свяще́нницы, лю́дие превозноси́те Его́ во ве́ки.

Страсте́й пещь опаля́ет мя, Дево, и потребля́ет огне́м сласте́й: предвари́вши, сострада́ния Твоего́ росо́ю ту угаси́ и пода́ждь души́ мое́й отра́ду изве́стную.

Украше́н доброде́тельми всеразли́чными, и уясне́н храм Вышняго ве́мы Тя, Всесвята́я, воспева́юще благоче́стно и превознося́ще во ве́ки.

Во двою́ естеству́ Еди́наго Тро́ицы боголе́пно без Се́мене родила́ еси́ Спа́са ми́ру; те́мже Тя ве́рнии, Богома́ти, любо́вию превозно́сим во ве́ки.

Непостижи́мый и всех Влады́ка, Его́же небеса́ не мо́гут вмести́ти, вмеща́ется, Де́во, во чре́ве Твое́м; те́мже Тя ве́рнии любо́вию превозно́сим во ве́ки.