Ирмос: Жезл из ко́рене Иессе́ова, и Цвет от него́, Христе́, от Де́вы прозя́бл еси́, из горы́, Хва́льный, приосенене́нныя ча́щи, прише́л еси́ вопло́щся от Неискусому́жныя, невеще́ственный и Бо́же, сла́ва си́ле Твое́й, Го́споди.

Ра́дуйся, иере́ов благогове́йных оде́ждо и преподо́бных удобре́ние; пра́ведных, ра́дуйся, ра́досте и му́ченик похвало́; ра́дуйся, ста́рцев же́зле и кре́посте вопию́щих: сла́ва си́ле Твое́й, Го́споди.

Ра́дуйся, слове́сная Голуби́це, преста́тие неве́рия нося́щая и к ве́ре Боже́ственней та́инственно привле́кшая я́же во тьме неве́жствия, Де́во, держи́мыя, ны́не же вопию́щия ве́рно: сла́ва си́ле Твое́й, Го́споди.

Жезло́м Боже́ственнаго ма́ния Твоего́ невла́жное мое́ се́рдце отве́рзши, слез исто́чники излива́ти и ре́ки, Богоро́дице, сотвори́, да те́ми от скве́рны грехо́вныя омы́вшеся, све́тло Сы́ну Твоему́ яви́тся.

Возни́кни, окая́нная душе́, и воззови́ из глубины́ твоих зол еди́ному Бо́гу на́шему: согреши́х Ти, Спа́се, но уще́дрив, спаси́ мя Ро́ждшия Тя безму́жно мольба́ми, и ко избра́нным, я́ко Благ, сопричти́.