Ирмос: Впещи́ о́троцы Изра́илевы, я́коже в горни́ле, добро́тою благоче́стия, чисте́е зла́та блеща́хуся, глаго́люще: «Благослови́те, вся дела́ Госпо́дня, Го́спода, по́йте и превозноси́те во вся ве́ки».

Умертви́вшися, окая́нная душе́, лю́те нераде́нием, возста́ни а́ки от сна и Хода́таицу сотвори́ еди́ну неискусому́жную Богоро́дицу, я́ко да тя о́бразы оживи́т покая́ния и безстра́стия ти пока́жет стези́.

Успи́ у́бо всестра́стная моя́ похоте́ния, и страсте́й душетле́нных мечты́ в коне́ц, Богома́ти, изгла́ди, да сла́влю при́сно и благословля́ю Тя, еди́ну вину́ всех спасе́ния.

Всеобра́зно вся́ку сласть соверши́х безу́мно и вся моя́ чу́вства сту́дно оскверни́х, к Тебе́ прибега́ю, Нескве́рнеи́: Влады́чице, всех гре́шных предста́тельство, изба́ви огня́ и тьмы ве́чныя.

Кропле́нием слез моих, Чи́стая, измы́й гной и стру́пы души́ моея́, Христа́ ро́ждши, прокаже́нныя исцеля́юща и кровоточи́выя, я́ко да услы́шу глас вожделе́н: «Спаса́и́ся ве́рою твое́ю, иди́ в ми́ре».