Ирмос: Услышах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Чре́во Твое́, Нескве́рная, небе́с простра́ннее бысть, вме́щшее Невмести́маго, Его́же моли́ спасти́ пою́щия Тя.

Ту́не поми́луй мя, Богома́ти, неду́гов же вся́ческих измени́ и му́ки исхити́, прибе́жище мое́ и предста́тельство.

На Тя все упова́ние возлага́ю спасе́ния моего́ и жития́ окормле́ние, Благода́тная Присноде́во.

Наде́жда моя́ и похвала́, прибе́жище, живо́т и заступле́ние, предста́тельство и утеше́ние Ты еси́, Всечестна́я Отрокови́це.