Ирмос: Бо́жия снизхожде́ния огнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: «Благослове́н еси́, Бо́же оте́ц на́ших».

Не и́мам умиле́ния, ниже́ смире́ния в се́рдцы мое́м, ниже́ бде́ния, ни моли́твы, ниже́ воздержа́ния, ни ины́я доброде́тели ки́я; те́мже Ти вопию́: ту́не спаси́ мя, Влады́чице.

Ума́ омраче́нием покая́ния отню́д не стяжа́х, ни поуче́ния сме́ртна, ни целому́дрия су́щие, ни му́дрости, но ниже́ му́жества с пра́вдою; те́мже Ти вопию́: ту́не спаси́ мя, Влады́чице.

Дмя́ся страстьми́ и вся́ческими процвета́яй грехи́, о вня́тии стра́ха Бо́жия и Бо́гу предстоя́нии небрего́х, та́кожде о любви́, наде́жде и ве́ре; те́мже Ти вопию́: ту́не спаси́ мя, Влады́чице.

Несть ин, и́же па́че мене́ согреши́ на земли́, ниже́ та́ко прогне́ва Сотво́ршаго, блу́дно живы́й, я́ко аз окая́нный; те́мже Ти вопию́: ту́не спаси́ мя, Влады́чице.