Ирмос: Колесницегони́теля фарао́ня погрузи́, чудотворя́й иногда́ Моисе́йскии́ жезл, крестообра́зно порази́в и раздели́в мо́ре, Изра́иля же беглеца́ пешехо́дца спасе́, песнь Бо́гови воспева́юща.

От скве́рных усте́н благода́рственную приими́ песнь, Всенепоро́чная, я́ко пре́жде Сын Твой, Бог мой и Госпо́дь вдови́чи прия́л есть ле́пте, и разреше́ние долго́в пода́ждь ми, я́ко да по до́лгу почита́ю Тя.

Сло́во Бо́жие вопло́щшееся преесте́ственно родила́ еси́, прежде Безпло́тнаго, богому́жно в ми́ре пожи́вша, Пречи́стая Богоро́дице; те́мже Тя чтим вси и по до́лгу ублажа́ем.

Еже Богоро́дицу Тя пропове́дати вся́кия е́реси отвраще́ние вво́дит: естество́м бо Бы́вшаго пре́жде тва́ри, пло́тию родила́ еси́ непреме́нно, Сло́во Бо́жие ве́чное.

Богороди́тельнице Мариа́м, Тобо́ю обоже́ния улучи́ челове́ков смире́нное естество́ и теку́щее*; в Тебе́ бо плоть мою́ уневе́стивый Бог, воипоста́сно сию́ просвети́л и на не́бо возве́л есть.