Ирмос: Помо́щник и Покрови́тель бысть мне во спасение, Сей мой Бог, и просла́влю Его́, Бог отца́ моего́, и вознесу́ Его́, сла́вно бо просла́вися.

Ио́иль чу́дный, Госпо́день вели́кии́ проро́к, боговеща́тельне рече́ е́же пла́кати свяще́нне и рыда́ти во вре́тищи, но аз небрегу́; Ты же, Де́во, спаси́ мя.

Яко исто́чник су́щи благоутро́бия, Богороди́тельнице, те́ло и ду́шу оскве́рншаго сту́дно, омы́й и оде́ждею чи́стою облецы́ благода́ти.

Не пре́зри, Блага́я, растли́вшася в беззакониях, сластьми́ го́рькими всего́ оскверне́на бы́вша уже́, но ка́ла мя вся́каго омы́й и спаси́.

«Да изы́дут черто́га бра́чна жени́х с неве́стою», глаго́лет проро́к, «и плачево́пльствие ны́не да сотворя́т»[74]; мы же к Ма́тери Изба́вителя достожа́лостне, душе́ моя́, припаде́м.