Ирмос: Колесницегони́теля фарао́ня погрузи́, чудотворя́й иногда́ Моисе́йскии́ жезл, крестообра́зно порази́в и раздели́в мо́ре, Изра́иля же беглеца́ пешехо́дца спасе́, песнь Бо́гови воспева́юща.

Юже ко мне, Нескве́рная, сострада́ния Твоего́ превосходя́щую благода́ть ка́ко дерзну́ воспе́ти, Влады́чице? Или́ ка́ко изря́дное промышле́ния Твоего́ просла́влю, зане́ от сме́рти спасла́ еси́ мя толи́ко сея́ досто́йнаго?

Вбеззакониях зача́т окая́нный, весь роди́хся грехо́в испо́лнь; не ве́дый чесо́ ина́го, еди́н бо бех сосу́д зело́ непотре́бен человеколюбно Сотво́ршему мя. Но помози́ мне, ми́ра Владычице.

Разреши́ страсте́й моих мглу, Всепе́тая, све́том рождества́ Твоего́, мра́чный о́блаки восприя́тии́ моих дале́че от ума́ отгоня́щи, и чи́стый безстра́стия свет ра́бу Твоему́ возсия́й.

Увы́ мне, злым сочта́нием лю́те держи́му, Влады́чице! Увы́ мне, еди́ну от челове́к в па́губный ров низпо́лзшуся, и сласте́й злосмра́дием я́ту, и е́же из пла́мене сих избавле́ния ожида́ющу.