Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.

Ра́дость заче́ншая, ра́дуйся, Де́во Богоневе́сто, кля́твы отчужде́ние; ра́дуйся, Всенепоро́чная; ра́дуйся, Влады́чице, заступле́ние ми́ру; ра́дуйся, прибе́жище притека́ющих к Тебе́.

Ра́дости су́щи Хода́таица, ра́дуйся, Богоневе́сто Влады́чице, кля́тву уничижи́вшая; ра́дуйся, Неискусому́жная; ра́дуйся, Всесвята́я, души́ моея́ покро́ве; ра́дуйся, Матероде́во; ра́дуйся, Всепе́тая.

Ра́дуйся, Боже́ственная трапе́зо; ра́дуйся, све́щниче всесве́тлый; ра́дуйся, престо́ле о́гненный; ра́дуйся, хра́ме Бо́жий; ра́дуйся, колесни́це всех Царя́; ра́дуйся, гра́де Вседержи́теля.

Ра́дуйся, горе́ свята́я; ра́дуйся, небе́сный мо́сте; ра́дуйся, одр одушевле́н; ра́дуйся, о́блаче златоза́рный; ра́дуйся, Нескве́рная, ве́рных спасе́ние; ра́дуйся, Всенепоро́чная; ра́дуйся, Всепе́тая.