Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Из пе́рсти созда́вый мя, Влады́ко, по о́бразу Твоему́ и сыноположе́ния Твоего́, Человеколюбче, сподо́бивый, соблюди́, я́ко Благоутро́бен.

Безме́рным согреше́нием моим сообра́зно низложе́н есмь, Чи́стая, озлобля́ющих скорбьми́; сего́ ра́ди очище́ние даждь ми и печа́лей избавле́ние.

Моли́твами Твоими сла́вы Боже́ственныя испо́лни и све́та неизрече́нна сподо́би певцы́ Твоя́, Богора́дованная Влады́чице.

Осужде́ния мя ве́чнаго изба́ви, Влады́чице Чи́стая, и ра́дости Боже́ственныя сподо́би и пи́щи ра́йския хода́тайствы Твоими.

Седален, глас пятый. Подобен:Собезнача́льное Сло́во:

Ра́дуйся, ле́ствице Госпо́дня богоутвержде́нная; ра́дуйся, мо́сте богопрохо́дный; ра́дуйся, прибе́жище ве́рных и очисти́лище, приводя́щая ны к Сы́ну Твоему́ и Бо́гу, всегда́ к Твоему́ кро́ву притека́ющия, Богоро́дице, я́ко в приста́нище тиша́йшее.