Ирмос: Иса́ие, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́; Его́же велича́юще, Де́ву ублажа́ем.

Окаля́вый я́ко челове́к ду́шу мою́ согреше́нии мно́гими и плотски́ми страстьми́ оскверни́выйся, прошу́, Нескве́рная, спротяже́нно Тя и молю́ся: Твоими мольба́ми ны́не очи́сти мя от вся́кия зло́бы.

Водителя ми́лости родила́ еси́ и щедро́т, Человеколю́бца еди́наго Бо́га бла́га, долготерпя́ща, благоутро́бна; Его́же ми́лостива покажи́ ми Твоими моли́твами, и грехо́в разреше́ние да́руй.

Себе́ само́го рыда́ю, помы́шляя грехо́в моих мно́жество, страсте́й наведе́ния, души́ ожесте́ние и ума́ премене́ние: отча́яннаго мя спаси́, Нескве́рная, ми́лостию Твое́ю.

Благословля́ю, сла́влю Тя, и велича́ю те́пле, Всечи́стая; благослови́ у́бо певца́ Твоего́, и от всех изба́ви проти́вных и оскорбля́ющих, и соблюди́ Твоими дла́ньми непобеди́ма.

Стхиры, глас пятый. Подобны:Ра́дуйся, по́стников:

Ра́дуйся, земноро́дных наде́ждо, земле́ избра́нная, Чи́стая и Нескве́рная, Ты бо еси́ исто́чник Уте́шителев запечатле́нный, от него́же пою́щии́ Тя обрета́ют спасе́ние. Ро́да челове́ча, ра́дуйся, всеконе́чное воззва́ние, село́ благопло́дно, прозя́бшее Клас; ра́дуйся, мо́сте, живо́т наш ко обоже́нию преводя́й, Ко́рмчия Боже́ственная, обурева́емых анки́ро[62], приста́нище спасе́ния всем любо́вию взыска́ющим Тя, Благооти́шная.

Ра́дуйся, Отрокови́це, светоза́рный и све́тлый исто́чниче, из него́же чи́стая и нему́тная произы́де вода́, напоя́ющи содержи́мых пла́менем греха́ и озлобле́ния. Ра́дуйся, заре́, Со́лнце в мир вве́дшая; ра́дуйся, пре́лести заблужде́ние угаси́вшая и вся к Боже́ственней ве́ре привле́кшая; ра́дуйся, многовожделе́нное и́мя конце́м; ра́дуйся, ве́рных спасе́ние; ра́дуйся, исправле́ние челове́ков; Бо́га, ра́дуйся, Ма́ти, подаю́щаго ми́рови ве́лию ми́лость.

«Ра́дуйся» арха́нгельски приглаша́ем[63]Ти, Чи́стая, вся коле́на земна́я, и любо́вию благохва́лим Тя, припева́юще те́пле: ра́дуйся, Боже́ственная ста́мно, Ма́нну нося́щая, исто́чниче присноживый и сладча́йшую иска́паяй во́ду, от нея́же пию́ще вси очища́емся скве́рны злоу́мия; ра́дуйся, утвержде́ние ми́ра незы́блемо, благоче́стия держа́во и Це́ркве водруже́ние; Бо́га, ра́дуйся, Ма́ти, подаю́щаго ми́рови ве́лию ми́лость.

Уста́ви ре́ки страсте́й, греха́ моего́ пучи́ну пото́ком изсуши́ моле́ния Твоего́, и ко приста́нищу Боже́ственных хоте́ний честны́х наста́ви; враги́, души́ мое́й стужа́ющия всегда́ и безме́стными ю сластьми́ возмуща́ющия, в ти́не поги́бельней погрузи́; се́рдце мое́ ра́дости испо́лни и сла́дости; о́блак расто́ргни, вопию́ Ти, печа́ли, Всечи́стая, Христа́ моля́щи пода́ти согреше́нных мно́ю проще́ние.