Ирмос: Колесницегони́теля фарао́ня погрузи́, чудотворя́й иногда́ Моисе́йскии́ жезл, крестообра́зно порази́в и раздели́в мо́ре, Изра́иля же беглеца́ пешехо́дца спасе́, песнь Бо́гови воспева́юща.

Не́мощи моя́ и боле́зни исцели́, Богороди́тельнице, я́ко Бо́га Сло́ва пло́тию ро́ждшая, Иже страстьми́ Своими на́ша я́звы и неду́ги всех поне́сша и неможе́ния уврачева́вша.

Без боле́зней поро́ждши, Влады́чице, боле́зни моя́ и тя́жкия труды́ и утесня́ющия мя и соугнета́ющия отвсюду люте́йшия ско́рби облегчи́, осла́би и посеще́нием Твоим уврачу́й.

Обрати ми плач болезни моея́ в здра́вия ра́дость, темное вретище злорастоврения моего, Дево, раздра́вши, светлым благорастворения препояши веселием мя, и ра́дования исполни.

Возгнеща́емая страстеи́ пещь искрами горящими тлетворных неду́г и пламеноносным у́глием разжиза́ет и опаляет мене огнем темнейшим, но а́ще ороси́ши мя, Влады́чице, исцеление роса́ Твоя бу́дет ми.