Ирмос: Отча не́дра не оста́вль и соше́д на зе́млю, Христе́ Бо́же, та́йну услы́шах смотре́ния Твоего́ и просла́вих Тя, еди́не Человеколюбче.

Иже в мы́сленных не́дрех Отчих я́ко Сын возлю́блен седя́й, в не́дрех Твоих седи́т, я́ко Сын Твой, Всечи́стая, Единоро́дный и Перворо́дный.

Многоцвету́щ явила́ся еси́ сад, благоуха́нный вертогра́д и рай доброцве́тный, сладково́нными противоды́хающи обоня́ньми благода́тей Твоих, Всепе́тая, и мирска́я отгоня́щи злосмра́дия.

От ко́рене ца́рска и от коле́на и сро́дства Дави́дова, я́ко цвет красе́н произра́стшая, процвела́ еси́, Цари́це, Царя́ Христа́.

Дави́дскую песнь Тебе́, Чи́стая, прера́достно вопие́м, зову́ще: ра́дуйся, горо́ ту́чная и свята́я, позлаще́нный ковче́же у́мнаго и честна́го свяще́ния.