Ирмос: Во́ды дре́вле, ма́нием Боже́ственным, во еди́но сонмище совокупи́вый и раздели́вый мо́ре изра́ильтеским лю́дем, сей Бог наш, препросла́влен есть; Тому́ еди́ному поим, я́ко просла́вися.

Иже в Тебе́ неизрече́нно все́льшася Бо́га Сло́ва моли́, Ма́ти Де́во, страсте́й свободи́ти безче́стия мя и умиле́ние да́ти смире́нному се́рдцу, и долго́в очище́ние дарова́ти.

Оскверне́ну от дел безме́стных окая́нную ду́шу мою́, чисти́тельными то́ки благоутро́бия Твоего́, Всенепоро́чная, уясни́, храм ю́ Свята́го и Всечестна́го Духа соверша́ющи све́тлый.

Очисти́лище Боже́ственное, Богоро́дице Де́во, су́щая лю́дем христоиме́нным, к Тебе́ вси ве́рно притека́ем, и разреше́ние обрета́ем согреше́ний лю́тых, и спаса́емся от вся́ческих зол.

Де́ву Мари́ю, душе́ моя́, иму́щу щедро́ты безме́рныя и челове́ки спаса́ющу от разли́чных зол, твою́ Предста́тельницу обре́тши, припади́ к Сей, взыва́ющи: Влады́чице Всенепоро́чная, помощи́ мне потщи́ся.