Ирмос: Проро́ка Ио́ну подражая́, вопи́ю: живо́т мой, Бла́же, свободи́ из тли, и спаси́ мя, Спа́се ми́ра, зову́ща: сла́ва Тебе́.

Вины́ страсте́й не отсека́ю отню́д и безстра́стия ищу́ в моли́твах вы́ну, Всепе́тая: окамене́ния моего́ изба́ви и спаси́ мя.

Превзыдо́х воистинну содо́мляны студодействуяй, и страшуся, да не огнь потребит мене́ та́мо, Богоневе́сто: сего́ искуше́ния изми́ и спаси́ мя.

Стеню́, трепе́щу и вопию́: не пре́зри мя, Чи́стая, в стра́сти всеце́ло впа́дшаго лю́тыя, но уще́дри и к покая́нию руково́дствуй.

Живу́ща огражда́й мя при́сно, избавля́ющи искуше́ний, исходя́ща же от земли́ к жи́зни ве́чнеи́ путенаста́ви, Матероде́во, благоутро́бием Твоим.

Седален, глас первый. Подобен:Лик а́нгельскии́:

Пода́ждь ми, Чи́стая, умиле́ния то́ки, слез оби́льное и бога́тое пролия́ние, бе́здну источи́вшая бла́гости и щедро́т, возража́ющу зол наводне́ние, уставля́ющу финики́йский страсте́й моих ток и безчи́нно взира́ние.