Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: «От тли изба́ви мя, Иису́се, Царю́ сил».

Всади души мое́й, я́ко дре́во многоприно́сно, Боже́ственный страх, и плод я́же внутрь сподо́би доброде́телей принести, от нихже пита́ется челове́к, Влады́чице.

Возсия́й покая́ния мне лучи, и о́блаки разори помышле́ний лука́вых, о́блаче Со́лнца пра́вды, Всенепоро́чная.

Укроти страсте́й моих свире́пое вла́яние[46], и бу́рю помысло́в потребм, тве́рдое всех предста́тельство и покро́в, Всепе́тая.

Умно́жишася па́че песка́ морска́го прегреше́ния души моея́, и я́ко бре́мя тя́жкое му́чат мя, но Ты, Де́во, пре́жде конца́ спаси, уще́дривши.

Седален, глас четвертый. Подобен:Ско́ро предвари́:

Чистая, Неискусобра́чная, христиа́н упова́ние, ни́щих Засту́пнице, скорбя́щих ра́досте, пла́чущих утеше́ние, изба́ви мя, содержи́ма напа́стьми неча́янными, исцели́ мя, неду́гующа пло́тию и ду́хом: к Тебе́ бо прибего́х, еди́на Все непоро́чная.