Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: «Во спасе́ние люде́й Твоих спасти́ пома́занныя Твоя́ прише́л еси́».

Неора́нная яви́лася еси́ ни́ва, невсе́ян прозя́бшая и Боже́ственный Клас; те́мже а́лчуща мя напита́й дарми́ и благода́тьми Твоими.

Неду́гующа мя к сме́рти душе́вней, Влады́чице, и страсте́й огневи́цею содержи́ма, моли́тв водо́ю Твоих напоивши, вско́ре возста́ви.

Яко су́щи град Бо́жий одушевле́н, его́же рек мы́сленных веселя́т стремле́ния, моле́ний Твоих столпо́м души́ моея́ хра́мину утверди́.

Облак разумева́я Тя, Пра́вду и́стинную окропи́вый, молю́, Пречи́стая, всех оби́дящих ско́ро изба́вити раба́ Твоего́.