Ирмос: Пре́жде век от Отца́ рожде́нному нетле́нно Сы́ну, и в после́дняя от Де́вы воплоще́нному безсе́менно Христу́ Бо́гу возопии́м: вознесы́й рог наш, Свят еси́, Го́споди.

Ра́дуйся, Превы́шшая безпло́тных всех сил; ра́дуйся Неневе́стная Де́во, ро́ждшая безсе́менно Христа́ Бо́га, Ему́же пое́м: вознесы́й рог наш, Свят еси́, Го́споди.

Радуйся, царей благочестивых диади́мо честна́я; ра́дуйся, му́чеников Боже́ственная кре́посте и огнезра́чный престо́ле Христа́ Бо́га, Ему́же пое́м: вознесы́й рог наш, Свят еси́, Го́споди.

Мно́жество согреше́ний и бед погружа́ет мя окаяннаго, но в приста́нище утеше́ния и весе́лое прибе́жище Твоея всемо́щныя благода́ти напра́ви, яко да при́сно пою́ Тя, Всепе́тая.

О, па́че ума́ Твоих и неизрече́нных чуде́с, Богоневе́сто! Ка́ко и де́вствуеши, Собезна́чальнаго ро́ждши Сло́ва Отцу́ и Ду́ху Боже́ственному, Ему́же песнопое́м непреста́нно ве́рнии: Свят еси́, Го́споди.