Ирмос: От Иуде́и доше́дше о́троцы в Вавило́не иногда́ ве́рою Тро́ическою пла́мень пе́щный попра́ша, пою́ще: «Отце́в Бо́же, благослове́н еси́».

Простира́ю о́ко всеокая́нныя и злополу́чныя моея́ души́ к Тебе́, и вопию́ ве́рою к Сы́ну Твоему́, Спа́су и Соде́телю: Ма́тере Твоея́, Христе́, мольба́ми уще́дри мя.

Целе́б пучи́ну стяжа́вши, Де́во, Христа́ поро́ждшая, ка́плю изле́й и мне незави́стно, моле́бнику немощству́ющу Твоему́, отвсю́ду лю́те уя́звлену.

Всесвята́я Отрокови́це, умиле́ния испо́лни смире́нную мою́ ду́шу, я́ко да омочу́ храм Твой струя́ми сле́зными, и омы́ю, Чи́стая, скве́рну страсте́й.

Неискусобра́чная Неве́сто, сохрани́ вся прибе́гшия к Тебе́; а́ще не бы соблюда́ла рабы́ Твоя́, поги́бли вси бы́хом и снедь де́моном бы́ли.