Ирмос: Нетле́ния искуше́нием ро́ждшая и Всехитрецу́ Сло́ву плоть взаимода́вшая, Ма́ти Неискусому́жная Де́во Богоро́дице, прия́телище Нестерпи́маго, село́ Невмести́маго Зижди́теля Твоего́, Тя велича́ем.

Глаго́лы оте́ц Боже́ственных, Чи́стая, наставля́ют ны: отложе́ние зло́бы покая́ние есть и по сем удруче́ние, поще́ние, бде́ние, сокруше́ние се́рдца и плач очище́н, и́хже да́руй ми, Ма́ти Де́во.

Стра́шный день Влады́чень уже́ настои́т, ты же спи́ши, душе́ моя́, о́ле неразу́мия твоего́! Потщи́ся, воста́ни, слези́ боле́зненно и возопи́й Де́ве, поро́ждшеи́ Христа́: Богоро́дице, Ты мя уще́дри.

Жития́ ны́не, душе́ моя́, нощь належе́, гро́зный у́бо день истяза́ния соде́янных приближа́ется. Убо́йся суди́ща, ему́же предста́ти и́маши, сего́ ра́ди воззови́: спаси́ мя, Влады́чице.

Ты мне Засту́пница еси́ и прибе́жище, Ты весе́лие, Де́во, и Боже́ственная похвала́; изми́ мя вся́каго греха́, смертоно́снаго гне́ва, вре́да и бед, и бу́дущий стра́шный му́ки.

Стихиры, глас седьмый. Подобны:Днесь бдит:

Ра́дуйся, сладкоуха́нная я́блонь, я́же от цве́тов де́вства Ши́пок чермны́й прозя́бшая благово́нный; ра́дуйся, кри́не Боже́ственный, от него́же Бог кри́ны се́льныя пе́стрым одея́нием пло́ти непря́денным облече́, багряни́цу покрыва́ющим Соломо́ню; ра́дуйся, цве́те, вся́каго ша́ра пестро́тнейший[92].

Ра́дуйся, цари́ц Цари́це, ро́ждшая Царя́ ца́рствующих, Его́же Ца́рство Ца́рство есть всех веко́в; ра́дуйся, сме́рти ца́рство побе́ждшая и Ца́рство отве́рзшая, жи́зни хода́тайственное; ра́дуйся, Мариа́ме Всецари́це, Юже ца́рие почеству́ют.

Ра́дуйся, ле́гкий о́блаче, воздухови́ден же и тонча́йш, и́же телесе́ Своего́ зе́мленое и тяготе́ющее от чистоты́ Ве́рха обогаща́яй, на не́мже Христо́с воссе́д, я́ко Иса́ия рече́, в Еги́пет сни́з шел и сего́ и́долы сокруши́л, и к богоразу́мию пресочта́л есть.

Испо́лни се́рдце мое́ уми́ления, Отрокови́це, молю́ Ти ся, пода́ждь и души́ мое́й спаси́телен плач, я́рость мою́ на де́моны обрати́, вся́кое жела́ние ко Го́споду преложи́, в моли́твах упраздня́тися вы́ну укрепи́, я́ко да Тобо́ю живота́ улучу́ и све́тлости Боже́ственныя.