Ирмос: Го́ру Тя благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Спаси́ мя, Де́во Неискусобра́чная, спаси́ мя, да не пре́зриши, Блага́я, оби́дима лю́тыми сластьми́ и страстьми́, и по́мыслы скве́рными и лука́вствия испо́лненными, и де́монскими стуже́нии.

Яко моле́бник прихожду́, Нескве́рная, и вопию́ от те́плыя и боле́знующия души́: поми́луи́ мя и изба́ви огня́ ве́чнаго му́ки к Бо́гу Твоими непоро́чными моле́нии.

Пло́ти моея́ изнуре́ние, души́ же разслабле́ние кре́пкою ма́ния Твоего́, Честна́я Влады́чице, си́лою обнови́, поле́зное сим я́ве исцеле́ние подаю́щи ко е́же де́яти во́лю Бо́жию.

Ве́лие и всечестно́е та́инство сокрове́ннаго Бо́жия сове́та в Тебе́ всеи́стинно, Чи́стая, яви́ся, я́ко существо́м Невмести́мый все́ю тва́рию, во чре́ве Твое́м Сам вмести́лся есть.