Ирмос: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося нас ра́ди, ве́рнии, единому́дренно пе́сньми велича́ем.

Святе́йши а́нгел, херуви́м превы́шши, о́гненных серафи́м пребо́льши и вся́каго у́мна чи́на честне́йши, сла́вою без сравне́ния и че́стию превосхо́днейши, Мари́е, яви́лася еси́, Де́во Влады́чице.

Неве́сто Бо́жия Всесвята́я, сокро́вище спасе́ния, приста́нище в пучи́не напа́стей, покро́ве душ и заступле́ние, спасе́ние бу́ди ми и бога́тство, и прибе́жище всети́хое, ду́шу мою́ изме́рзшу покрыва́ющи и согрева́ющи.

Невозде́ланная страно́, Де́лателя поро́ждшая, ни́во, жи́зни Клас неора́нно прозя́бшая, до́брых избы́точествием и всех оби́лием благ, гла́дом иста́явша препита́й мя, Влады́чице.

Тебе́ Роди́вшей Творца́ всех и Спа́са, нищ и убо́г, что принесу́, недосто́йный? Ино ничто́же, но ве́ру о́гненну и при́сну любо́вь, и́миже спаси́ мя, Влады́чице.

Стихиры, глас вторый. Подобен:Егда́ от дре́ва:

Ра́дуйся, всесвяты́й хра́ме; ра́дуйся, Царе́во седа́лище; ра́дуйся, огнеобра́зный престо́ле Всецаря́; ра́дуйся, а́нгелов ра́досте; па́дшаго Ада́ма, ра́дуйся, воста́ние; ра́дуйся, Евино осужде́ние разреши́вшая; ра́дуйся, правосла́вных сла́во, гре́шных заступле́ние и оби́димых по́моще.

Ра́дуйся, клеще́ та́инственная, ю́же Иса́ия прови́де, Угль носи́вшая, очища́ющ от скве́рны всю тварь; ра́дуйся, купино́ неопа́льная и несгара́ющая; ра́дуйся, сто́лпе о́гнен, и́мже внидо́хом вси в Боже́ственный поко́й; ра́дуйся, ми́лости две́ре и гре́шных проще́ние.

Ра́дуйся, не́бо, зве́зды нося́щее дви́жимыя же и недви́жимыя; ра́дуйся, кру́же светле́йший зо́дий двана́десяти, его́же посреде́ прии́де Со́лнце Христо́с, и смотре́ния плотска́го о спасе́нии челове́ков обхожде́ние все испо́лни.

Еди́на невмести́маго Бо́га нетесновме́стно во утро́бе Твое́й носи́ла еси́, Челове́ка бы́вша за благосты́ню, Всесвята́я Богоневе́сто. Те́мже молю Тя: утесня́ющих мя страсте́й измени́, я́ко да те́сную правоше́ственно преше́д стезю, в широту́ дости́гну та́мошняго блаже́нства.