Ирмос: Не рыда́й Мене́, Ма́ти, зря́щи во гро́бе, Его́же во чре́ве без Се́мене зачала́ еси́ Сы́на: воста́ну бо и про сла́влюся, и вознесу́ со сла́вою, непреста́нно я́ко Бог, ве́рою и любо́вию Тя велича́ющия.

Дави́дская, ра́дуйся, колесни́це; Ааро́нов, ра́дуйся, же́зле; всечу́дный, ра́дуйся, Соломо́нова хра́ма дави́ре[73], о́гненное естество́ неизглаго́ланно содержа́й Божества́, Матероде́во Честна́я, Тя велича́ем.

Боже́ственное, ра́дуйся, сокро́вище живота́; ра́дуйся, сви́тче, Христа́ внутрь имы́й, Сло́ва и Бо́га; ра́дуйся, богопи́санная скрижа́ле Моисе́ова; ра́дуйся, ра́досте ми́ра, Матероде́во Честна́я, Тя велича́ем.

Ра́дуйся, све́те незаходи́мый, его́же Бог посреде́ всего́ утверди́ озари́ти небе́сная у́мно, вку́пе же и земна́я; ра́дуйся, Влады́чице всех, Матероде́во Честна́я, Тя велича́ем.

Преизлива́ется благода́ть бога́тно Твоя́ на всех ве́рою приходя́щих к Тебе́, Нескве́рная; те́мже благода́ти испо́лни рабы́ Твоя́, я́ко да любо́вию, Матероде́во Честна́я, Тя велича́ем.

Стихиры, глас шестый. Подобны:Вся отло́жше:

Ра́дуйся, горо́ свята́я; ра́дуйся, све́та о́блаче; ра́дуйся, ле́ствице одушевле́нная, е́юже к небе́сному вознесо́хомся ме́ртвии, честно́му же и Боже́ственному жи́тельству; ра́дуйся, раю́, дре́во жи́зни посреде́ име́яй Христа́, упраздни́вшаго пе́рваго дре́ва го́речь; ра́дуйся, Евы дре́внюю кля́тву потре́бльшая; ра́дуйся, Ада́мово воззва́ние; ра́дуйся, Всенепоро́чная Присно де́во Влады́чице.

Ра́дуйся, всезлата́я ста́мно, Ма́нну небе́сную внутрь стяжа́вшая; ра́дуйся, пала́то Всецаря́; ра́дуйся, Боже́ственный покро́ве; ра́дуйся, ту́чная горо́; ра́дуйся, ме́сто свяще́ния; ра́дуйся, сладково́нный Ши́пок поро́ждшая, ве́рныя облагоуха́яй; ра́дуйся, Богома́ти Нескве́рная; ра́дуйся, ма́терей украше́ние и сла́во и́стинная; ра́дуйся де́вственных похвало́ и удобре́ние все честно́е.

Ра́дуйся, сла́дкое и́мя и де́ло, Отрокови́це Мари́е, услажде́ние язы́ка и сла́достное поуче́ние се́рдца моего́; душа́ моя́, Тебе́ вслед теку́щи, прилепи́ся вся, и я́коже еле́нь на пото́ки водны́я, си́це к Тебе́ возжеле́ весь ум мой и исчезе́; те́мже десни́ца Твоя́ благоутро́бно да засту́пит мя, Чи́стая, и сла́вы лица́ Твоего́ сподо́бит.

Мно́гими содержи́мь ны́не напа́стьми, всеокая́нный, к Тебе́ прибега́ю, Всенепоро́чная: спаси́ мя, недосто́йнаго, мно́го согре́шша, я́ко никто́же ин, си́льна еси́ помощи́ ми, вся бо мо́жеши ели́ка хо́щеши, Отрокови́це Всепе́тая, я́ко Ма́ти Преблага́я Всеси́льнаго Бо́га на́шего. Влады́чице ми́ра, предста́тельство кре́пкое ве́рных, не пре́зри раба́ Твоего́, на Тя упова́юща.