Ирмос: Непроходи́мое волнящееся море, Божиим Свойм веле́нием изсуши́вшему, и пешеше́ствовати сквозе́ е израильтеския лю́ди наста́вльшему, Господеви пои́м, сла́вно бо просла́вися.

Похвале́ний Тебе́ присноцвету́щий вене́ц ны́не истки́, Всечи́стая, Це́рковь Ду́хом, и приносит благогове́йно со архангелом Гаврии́лом невестоводцем, «ра́дуйся» поющи и Тя присночеству́ющи.

Возде́лавши виногра́д живоно́сный, Христа́ и Го́спода, земля́ свята́я Отца́ па́че ума́ яви́лася еси́, Ма́ти Де́во Всепе́тая, и пи́вом жи́зни Боже́ственныя мир напоила еси́.

Волну́емый лю́те грехми́ и бе́дствуяй мир весь, я́ко приста́нище ти́хое, Ты от го́рькия бу́ри спасла́ еси́, Христа́ Упра́вителя, Спа́са и Го́спода Ро́ждшая.

Прибе́жище Тя и спасе́ния град вси ве́рнии све́дуще, Мари́е, Ма́ти Христа́, Тебе́ мо́лимся те́пле: приими́ проше́ния ве́рных моле́бник Твоих и разреши́ вся от прегреше́ний осужде́ния.