Ирмос: Седя́й в сла́ве на престо́ле Божества́, во о́блаце легце прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й.

Пото́че живы́й безсме́ртия, окри́не, источи́вый благоутро́бия не́ктар сла́дкии́ и златостру́йный, я́же жа́ждею распала́емыя ороша́ющ, раю́ и́стинный, Всекра́сная Влады́чице.

Златоза́рный све́щник седмосве́тлыми благода́тьми Тя от ро́да всего́ Христо́с Со́лнце избра́, и от незаходи́мых снизше́д, уневе́сти неискусому́жно плоть челове́чу к назда́нию.

Содержи́теля всех ражда́еши, совоку́пльшаго в то́жде концы́ и разстоя́щаяся соеди́ншаго; Тобо́ю вы́шняя ни́зшим сликовству́ют и сла́вят вся я́ко Хода́таицу Тя, Влады́чице.

Де́лателище е́же двою́ соедине́ния естеству́, Отрокови́це, была́ еси́ па́че ума́, сло́ва и мы́сли, из Нея́же весь Влады́ка сотка́лся есть, не премене́нием, но соедине́нием понесы́й воплоще́ние.