Ирмос: Ро́да челове́ча обновле́ние дре́вле, поя́, проро́к Авваку́м предвозвеща́ет, ви́дети неизрече́нно сподо́бився о́браз: млады́й Младе́нец бо из го́ры Де́вы изы́де, люде́й во обновле́ние, Сло́во.

Имже есть язы́к вети́йствовати Боже́ственне, Твоими себе́ яснотворя́ще плеска́ньми[103], всю Тя показу́ют Христо́ву бли́жнюю, непоро́чну Де́ву, красну́ и чи́сту, всех очище́ние к Бо́гу спаси́тельное.

Сон отжени́ моея́ ле́ности, бо́дренна су́щи ко е́же спаса́ти, Де́во. Врага́ сие́ вои́стинну есть тьмоде́тельная вина́, зе́ницы бо смежи́л есть се́рдца моего́ всезло́бно, но безно́щный свет проше́нии мне Твоими хода́тайствуй.

Заступи́ вся я́же в труде́х скончава́ющия житие́, покрыва́ющи от вся́каго прило́га со проти́вна. Се бо я́коже многово́лненною бу́рею содержи́ми есмы́ у́жами грехо́вными, бу́ди по́мощь безбе́дная Твоим моле́бником.

Безму́жная Ма́ти, ка́ко Безо́тчаго зачина́вши? Непоро́чная Неве́сто, ка́ко ражда́еши в рождестве́? Бог истощи́выйся в челове́ческо естество́, плоть есть ны́не от Де́вы моея́, да к Себе́ привлече́т челове́ки.