Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою, ра́дуяся, Тоя́ чудеса́.

Ум мой, Нескве́рная, светоза́рным хода́тайством Твоим наста́ви ко Го́споду, Его́же воплоти́ла еси́, да ве́рою пою́ Твоя́ вели́чествия, по́мощь бо еси́ всех и избавле́ние.

Пала́та одушевле́нная я́ко су́щи Вседержи́теля Бо́га, хра́мы Го́спода Твоего́ соде́лай любо́вию Тя воспева́ющих, по́мощь бо еси́ всех и избавле́ние.

Исто́чник я́ко су́щи Боже́ственных благода́тей, Всенепоро́чная, благода́ти ка́плю ны́не и мне одожди́, потопля́ющую бе́здну моих страсте́й, по́мощь бо еси́ всех и избавле́ние.

Бо́га Преве́чнаго преесте́ственно я́ко ро́ждшая пло́тию, Сего́ моли́, Ма́ти Де́во, согреше́ний бе́здну моих презре́ти, по́мощь бо еси́ всех и избавле́ние.