Ирмос: Ужасе́ся о сем не́бо, и земли́ удиви́шася концы́, я́ко Бог яви́ся челове́ком пло́тски, и чре́во Твое́ бысть простра́ннейшее небе́с. Тем Тя Богоро́дицу а́нгелов и челове́к чинонача́лия велича́ют.

Воспе́та ка́ко Чи́стую возмогу́, душе́ю и се́рдцем нечи́стый? Ки́ими словесы Нескве́рную восхвалю́, аз оскверне́нный? Ка́ко Де́ву Юже зре́ти соскутова́ются[98]а́нгелов чи́ни, зре́ти дерзну́ во о́бразе си́це зле, я́ко и́мам? Те́мже мя уще́дри, Влады́чице.

Взе́мши мя, Де́во, за ру́ку десну́ю, Царю́ Безсме́ртному усво́й и Сы́ну Твоему́, погреше́нных пода́ти прося́щи ми оставле́ние и жития́ исправле́ние всеконе́чное; Тя бо предста́тельство, упова́ние и покро́в напису́ю аз, живя́й или́ умира́яй.

Сло́во, е́же глагола́х ны́не к Тебе́, ни зол моих вся исчи́сли, ниже́ о́тай сту́дная объяви́, но от челове́к сличе́но стыде́нием, вя́щшая утаи́. Ты же, Де́во, предложе́нная от мене́ прие́млющи, соверше́нное сих пода́ждь оставле́ние.

Черто́га безсме́ртнаго улучи́ти и сла́дости ра́йския сподо́би еди́ну Тя на земли́ наде́жду по Бо́зе иму́ща, еди́но моле́ние, еди́но предста́тельство, кре́пость еди́ну. Те́мже сокрове́нно дерза́я, сия́ глаго́лю: Влады́чице, спаси́ мя, раба́ Твоего́.

Стихиры, глас осьмый. Подобны:Го́споди, а́ще и на суди́щи:

Ра́дуйся, белообра́зный би́сере, светосия́нный и многоце́нный, Ро́ждшая от очервле́ния крове́й Твоих Воплоще́ннаго и сла́дкими Его́ зарелу́чными све́тлостьми ми́ра всего́ мрак, Всепе́тая, Просвети́вшаго.

Ра́дуйся, Де́во, на объя́тиих Твоих младоле́пно носи́вшая Иже на престо́ле сла́вы высо́цем боголе́пно Седя́ща, и на пе́рсех Твоих я́ко со́нна держа́вшая недре́манное о́ко Иму́ща и вся Назира́юща.

Ра́дуйся, Отрокови́це, Яже па́че ме́да, горта́ни сластнопита́тельнаго, и па́че со́та, усто́м и язы́ку сла́дость точа́щаго, и па́че са́мыя амвроси́и сла́дким и́менем Твоим сердца́ услажда́ющая пою́щих Тя.

Совлецы́ мя плаче́вныя ри́зы, и спаси́тельною Боже́ственнаго весе́лия ри́зою и ра́дования облецы́, я́ко да не изве́ржен бу́ду, не имы́й одея́ния бра́чна, от черто́га Сы́на Твоего́, Богора́дованная Влады́чице.