Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Плод Твой нетле́н и утро́ба нетле́нна, Чи́стая, па́че ума́ обоя́ показу́ема; те́мже ве́рнии «ра́дуйся» Ти досто́йно пое́м.

Нард ка́плющ и сот медвя́н и исто́чник животоча́щ чре́во Твое́, Бо́га роди́вше, яви́ся.

Умныя си́лы Тя и челове́ков вси ро́ди я́ко Бо́га ро́ждшую сла́вят, Присноблагослове́нная и Всенепоро́чная.

Лампа́до неугаси́мая, Свет у́мный ро́ждшая, отемне́нный мой смысл просвеще́нием озари́ Твоей благода́ти.

Седален, глас пятый. Подобен:Собезна́чальное Сло́во:

Ра́дуйся, две́ре Госпо́дня непроходи́мая, ю́же предпропове́даша вси му́жие пра́веднии: проро́к Дании́л го́ру несеко́му, и псалмопе́вец Дави́д с Моисе́ом и про́чими купину́, све́щник и ста́мну, жезл же и ле́ствицу, престо́л и Боже́ственный одр, Богороди́тельнице.