Ирмос: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.

Безбо́жных ага́рян стре́лы, Влады́чице, сокруши́, и всяк наве́т бесо́вскии́ су́етен сотвори́, лю́ди христоиме́нныя покрыва́ющи и соблюда́ющи, да любо́вию сла́вим Тя.

Мари́е, чи́стое и всечестно́е Зижди́теля пребыва́лище, сле́зное очище́ние души́ ми пода́ждь, и услы́ши мольбу́ мою́, Всенепоро́чная.

Пала́та у́мная Царе́ва была́ еси́, те́мже молю́: дом Тро́ицы покажи́ мя, Влады́чице, те́мныя стра́сти души́ моея́ изгоня́ющи.

Да осия́ет ны́не на мне неизрече́нное благоутро́бие Твое́, глубины́ грехо́в и неча́яния изменя́я и к покая́ния приста́нищем направля́я, Отрокови́це.

Седален, глас осьмый. Подобен:Недви́жимое утвержде́ние ве́ры:

Небе́сное чти́лище сил и мирско́е возноше́ние душ на́ших, Матероде́вственную Отрокови́цу восхва́лим, ве́рнии: ра́дуйся, а́нгелов Творца́ во утро́бе носи́вшая; ра́дуйся, согреша́ющих очище́ние, воплоти́вшая Бо́га Сло́ва; ра́дуйся, Неве́сто Неневе́стная.