Ирмос: Во́ды дре́вле, ма́нием Боже́ственным, во еди́но сонмище совокупи́вый и раздели́вый мо́ре изра́ильтеским лю́дем, Сей Бог наш, препросла́влен есть; Тому́ еди́ному пои́м, я́ко просла́вися.

Напои́тися бога́тно слеза́ми даждь бразда́м окая́нныя души́ моея́, и плоды́ приноси́ти стори́чествующия сподо́би, и се́рдце мое́ вся́ческаго испо́лни весе́лия, Влады́чице, да сла́влю Тя.

Благоутро́бием ми́лости, всех Влады́чице, поми́луй окая́нную ду́шу мою́ и огня́ изба́ви мя ве́чнаго и де́монска натече́ния[44], Богоро́дице, под кров Твой ны́не прибега́юща.

Яко нескве́рный дом Царе́в, страстьми́ безме́стными оскве́рншееся се́рдце мое́, мо лю́ся, очи́сти, Отрокови́це, мольба́ми Твоими, и чи́стаго жи́тельства де́лы обогати́, да сла́влю Тя.

Что неради́во, душе́ окая́нная, прехо́диши житие́, и не бойшися дне стра́шныя му́ки? Но воста́ни про́чее от низпаде́ний и ле́ности, усе́рдно зову́щи: Богоро́дице, спаси́ мя, Пречи́стая.