Ирмос: Устраши́ся всяк слух неизрече́нна Бо́жия сниз хожде́ния, я́ко Вы́шнии́ во́лею сни́де да́же и до пло́ти, от деви́ческаго чре́ва быв Челове́к; те́мже Тя, Пречи́стую Богоро́дицу, ве́рнии, велича́ем.

Воздви́жеся рог благочести́вых, вознесе́ну на дре́во Твоему́ Сы́ну и Бо́гу, Всенепоро́чная, Имже раздра́ся рукописа́ние, и упраздни́ся враг в коне́ц и паде́; те́мже Нескве́рная, я́ко всех сих вину́ Тя сла́вим.

То́ки слез моих состра́стно ви́дящи, умилосе́рдися на мне Влады́чице, ми́лостию Твое́ю смире́нную ду́шу мою́ при́сно обвеселя́ющи, освяща́ющи, соблюда́ющи и от руки́ бесо́вския исхища́ющи.

Царе́й благочести́вых держа́во, проро́к и апо́стол похвало́, иера́рхов добро́то, му́чеников удобре́ние и преподо́бных весе́лие, пра́ведных наслажде́ние, скорбя́щих ра́досте, не пре́зри, Отрокови́це, моле́ния раб Твоих.

Лю́дие, язы́цы и племена́, ю́ноши с де́вами, прии́дем Правосла́вия чи́стым смы́слом вси воспита́ни, Де́ве и Ма́тери Бо́га на́шего те́пле возопии́м: Всесвята́я, спаси́ всех мольба́ми Твоими.

Стихиры, глас осьмый. Подобны:О, пресла́внаго чудесе́:

Ра́дуйся, Де́во Богоневе́сто; ра́дуйся, ве́рных наде́ждо; ра́дуйся, ми́рови очище́ние; ра́дуйся, от вся́кия ско́рби рабы́ Твоя́ спаса́ющая; сме́рти, ра́дуйся, разоре́ние; живоно́сный, ра́дуйся, раю́; ра́дуйся, заступле́ние призыва́ющих Тя; ра́дуйся, Боже́ственное пребыва́ние и горо́ свята́я.

Ра́дуйся, Богоро́дице Пречи́стая; ра́дуйся, исто́чниче жи́зни; ра́дуйся, ле́ствице небе́сная; ра́дуйся, всея́ тва́ри Госпоже́ и Влады́чице; Благослове́нная, ра́дуйся, и Всенепоро́чная; ра́дуйся, Боже́ственное жили́ще; ра́дуйся, Всечестна́я; ра́дуйся, Де́во Ма́ти, Неве́сто Неневе́стная.

Ра́дуйся, Матероде́вственная Влады́чице; ра́дуйся, челове́ков еди́на наде́ждо и заступле́ние; ра́дуйся, грешных прибежище; ра́дуйся, свещниче всесве́тлый; преукрашенная, ра́дуйся, пала́то; светоносная, ра́дуйся, свеще; ра́дуйся, де́вства нескве́рная похвало; ра́дуйся, исто́чниче, исцеле́ния вре́яй к Тебе́ притека́ющим.

Приими́ моли́тву мою́ сию́, и не пре́зри, Чи́стая, пла́ча и слез, ниже́ отри́ни мене́, в лю́тых бе́дствующа, на Тя бо все ча́яние мое́ возложи́х, Богора́дованная еди́на: яви́ мя свобо́дна от всех оскорбля́ющих, и ра́дость да́руй, ра́дости я́ко Пода́тельница.