Ирмос: Росода́тельну у́бо пещь соде́ла Ангел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: «Благослове́н еси́», Бо́же оте́ц на́ших.

На Тя, Влады́чице, все упова́ние мое́ возложи́х, окая́нный: не отврати́ от мене́ лица́ Твоего́, утро́бу не затвори́ человеколю́бную, Ма́ти Бо́жия, но помози́ ми.

Согреше́ний бу́рею углеба́юща возведи́, Богоневе́сто, и к Боже́ственному мя безстра́стия напра́ви приста́нищу, Чи́стая, вопию́ща благогове́йно: благослове́н еси́, Бо́же оте́ц на́ших.

Беззако́ния де́лателище бех и вся́каго де́лания сту́дна пребыва́лище, и прия́телище помышле́ний злых, но Ты, Всепе́тая, Чи́стая, прия́телище Бо́га свято́е, мя освяти́.

Яко ассири́янин, мы́сленнаго смеше́ния Вавило́нска власти́тель[79], ум мой о́гненных помысло́в седмери́цею разжже́ во мне пещь, в не́йже мя неопа́льна, Чи́стая, Твое́ю росо́ю соблюди́.