Ирмос: Покры́ла есть небеса́ доброде́тель Твоя́, Христе́; из киво́та бо проше́д святы́ни, Твоея́ Нетле́нныя

Ма́тере, в хра́ме сла́вы Твоея́ яви́лся еси́, я́ко Младе́нец руконоси́мь, и испо́лнишася вся Твоего́ хвале́ния.

Яко одушевле́нный и живы́й слове́сен ковче́г, благослове́нная Мариа́м, Законода́вца Сло́ва а́ки Но́я вмеща́вши, от пото́па пре́лести избавля́юща мир и Нача́льника показу́ема ми́ра втора́го и жития́ лу́чшаго.

Злату́ю Тя почита́ем кади́льницу, в не́й- же Сло́во Отчее возже́г всесвяту́ю плоть Свою́, вселе́нную испо́лни Боже́ственныя вони́ и освяти́ возду́х, ту́ком жертв оскве́рншии́ся ме́рзких, Богоблаже́нная.

Врачева́ний всем ро́су ка́плеши, Чи́стая, я́ко исцеле́ний исто́чник и пото́к спасе́ния, и Бо́жия река́, вод испо́лнена невеще́ственных, душепита́тельных и животво́рных. Те́мже и мене́, молю́ся, неду́гующа исцели́.

Всенепоро́чная и́стинно и всех Влады́чице, Влады́ку всех заче́ншая несказа́нным сло́вом Христа́, от влады́чества беглеца́ Его́ мироде́ржца изба́вльши мя, при́снаго раба́ Твоего́ покажи́.