Ирмос: Во глубине постла́ иногда́, фараони́тское всевоинство преоруженная сила, воплощшееся же Слово всезлобный грех потреби́ло есть; препросла́вленный Господь, сла́вно бо просла́вися.

Вообрази́выйся от Тебе́ е́же по нам Солнце Невече́рнее, Тя слове́сное не́бо светле́йшее я́ве показа́, те́мже изба́ви мя страсте́й омраче́ния, я́ко да воспою́ любо́вию Тя, еди́ная Ма́ти Де́во.

Исто́чника ми́лости Христа́, Всесвята́я, ро́ждшая и Еде́м челове́ком отве́рзшая, врата́ ми отве́рзи ми́лости Твоея́, Богоро́дице, и да́руй согреше́ний, Влады́чице ми́ра, проще́ние.

Клещу́ у́мную, Угль нося́щу и челове́ков естество́ очи́щшую, молю́ Тя, Влады́чице, скве́рну грехо́в моих отжени́ и смуща́ющих изми́ мя страсте́й Твоими моли́твами.

Расто́ргни моих согреше́ний плени́цы, всех прибе́жище, Твоего́ Сы́на и Бо́га умоля́ющи, и низложи́, Присноде́во, томя́щии́ мя грех, да Тя почита́ю, всегда́ спаса́емь, Всепе́тая.